AS I was wand'ring ae midsummer e'enin,
The pipers and youngsters were makin their game,
Amang them I spyed my faithless fause luver,
Which bled a' the wounds o' my dolour again.------

Weel, since he has left me, may pleasure gae wi' him;
I may be distress'd but I winna complain:
I'll flatter my fancy I may get anither
My heart it shall never be broken for ane.----

I could na get sleepin till dawin, for greetin;
The tears trickl'd down like the hail and the rain:
Had I na got greetin, my heart wad a broken,
For Oh, luve forsaken 's a tormenting pain!
Weel, since he has &c.

Although he has left me for greed o' the siller,
I dinna envy him the gains he can win:
I rather wad bear a' the lade o' my sorrow,
Than ever hae acted sae faithless to him.----
Weel, since he has &c.