Buy Braw Troggin 4th Ballad

Buy Braw Troggin. An Excellent New Song

WHA will buy my Troggin,
Fine ELECTION WARE;
Broken trade o' Broughton
A' in high repair.

Chorus
Buy braw Troggin,
Frae the Banks o' Dee!
Wha want Troggin,
Let them come to me.

Here 's a noble Earl's
Fame and high renown,
For an auld sang--------
It 's thought the Gudes were stown.
Buy braw Troggin,&c.

Here 's the Worth o' Broughton,
In a needle's e'e:
Here 's a reputation,
Tint by Balmaghie.
Buy braw Troggin,&c.

Here 's an HONEST CONSCIENCE,
Might a Prince adorn,
Frae the Downs o' Tinwald,
--------So was never worn.
Buy braw Troggin,&c.

Here 's its Stuff and Lynin,
Cardoness's Head;
Fine for a Soger,
A' the wale o' lead.
Buy braw Troggin,&c.

Here 's a little Wadset,
Buittle's scrap o' Truth;
Pawn'd in a gin-shop,
Quenching haly drouth.
Buy braw Troggin,&c.

Here 's Armorial Bearings
Frae the Manse of Urr;
The crest, an auld crab-apple,
Rotten at the core.
Buy braw Troggin,&c.

Here is Satan's Picture,
Like a bizzard-gled,
Pouncing poor Redcastle,
Sprawlin as a tade.
Buy braw Troggin,&c.

Here 's the font where Douglas
Stane and mortar names;
Lately us’d at Caily,
Christening Murray's crimes.
Buy braw Troggin,&c.

Here 's the Worth and Wisdom
Collieston can boast;
By a thievish Midge
They had been nearly lost.
Buy braw Troggin,&c.

Here is Murray's Fragments
O' the Ten Commands;
Gifted by BLACK JOCK
--------To get them off his hands.
Buy braw Troggin,&c.

Saw ye e'er sic Troggin?
If to buy ye 're slack,
HORNIE's turning Chapman,
He 'll buy a' the Pack!

Buy braw Troggin,
Frae the Banks o' Dee!
Wha want Troggin,
Let them come to me.