O Whistle and I’ll come to ye my lad – Song

O WHISTLE, and I'll come to ye, my lad,
O whistle, and I'll come to ye, my lad;
Tho' father, and mother, and a' should gae mad,
Thy JEANIE will venture wi’ ye, my lad.

But warily tent, when ye come to court me,
And come nae unless the back-yett be a-jee;
Syne up the back-style and let naebody see,
And come as ye were na comin to me------
And come as ye were na comin to me.------
O whistle &c.

At kirk, or at market whene'er ye meet me,
Gang by me as tho' that ye car'd na a flie;
But steal me a blink o' your bonie black e'e,
Yet look as ye were na lookin to me------
Yet look as ye were na lookin to me.------
O whistle &c.

Ay vow and protest that ye care na for me,
And whyles ye may lightly my beauty a wee;
But court nae anither, tho' jokin ye be,
For fear that she wyle your fancy frae me----
For fear that she wyle your fancy frae me.--------