The Lass of Ecclefechan

GAT ye me, O gat ye me,
O gat ye me wi' naethin,
Rock and reel and spinnin wheel
A mickle quarter bason.
Bye attour, my Gutcher has
A hich house and a laigh ane,
A' for bye, my bonnie sel,
The toss o' Ecclefechan.

O had your tongue now, Lucky Laing,
O had your tongue and jauner;
I held the gate till you I met,
Syne I began to wander:
I tint my whistle and my sang,
I tint my peace and pleasure;
But your green graff, now Lucky Laing,
Wad airt me to my treasure.