GANE is the day, and mirk's the night,
But we'll ne'er stray for faute o' light,
For ale and brandy 's stars and moon,
And blude-red wine 's the rysin Sun.

Then guidewife count the lawin, the lawin, the lawin,
Then guidewife, count the lawin, and bring a coggie mair.

There 's wealth and ease for gentlemen,
And semple-folk maun fecht and fen;
But here we're a' in ae accord,
For ilka man that 's drunk 's a lord.
Chos. Then goodwife count &c.

My coggie is a haly pool
That heals the wounds o' care and dool;
And pleasure is a wanton trout,
An ye drink it a', ye'll find him out.
Chos. Then goodwife count &c.