My Collier laddie——–

WHARE live ye, my bonie lass,
And tell me what they ca' ye?
My name, she says, is Mistess Jean,
And I follow the Collier laddie.
My name, she says, is Mistess Jean,
And I follow the Collier laddie.

See you not yon hills and dales
The sun shines on sae brawlie?
They a' are mine, and they shall be thine,
Gin ye'll leave your Collier laddie.
They a' are &c.

Ye shall gang in gay attire,
Weel buskit up sae gaudy;
And ane to wait on every hand,
Gin ye'll leave your Collier laddie.
And ane to wait on every &c.

Tho' ye had a' the sun shines on,
And the earth conceals sae lowly;
I wad turn my back on you and it a',
And embrace my Collier laddie.
I wad turn &c.

I can win my five pennies in a day,
And spen 't at night fu' brawlie;
And make my bed in the Collier's neuk,
And lie down wi' my Collier laddie.
And make my bed &c.

Loove for loove is the bargain for me,
Tho' the wee Cot-house should haud me;
And the warld before me to win my bread,
And fair fa' my Collier laddie!
And the warld before me to win my bread,
And fair fa' my Collier laddie!