O ken ye what Meg o’ the mill has gotten

O KEN ye what Meg o' the mill has gotten,
An' ken ye what Meg o' the mill has gotten;
A braw new naig wi' the tail o' a rottan,
And that's what Meg o' the mill has gotten.

O ken ye what Meg o' the mill lo'es dearly,
An' ken ye what Meg o' the mill lo'es dearly;
A dram o' gude strunt in the morning early,
And that's what Meg o' the mill lo'es dearly.

O ken ye how Meg o' the mill was married,
An' ken ye how Meg o' the mill was married;
The Priest he was oxter'd, the Clerk he was carried,
And that's how Meg o' the mill was married.

O ken ye how Meg o' the mill was bedded,
An' ken ye how Meg o' the mill was bedded;
The groom gat sae fu he fell awald beside it,
And that's how Meg o' the mill was bedded.

[B] Ken ye what Meg o’ the mill has gotten---

O KEN ye what Meg o' the mill has gotten,
An ken ye what Meg o' the Mill has gotten?
She gotten a coof wi' a claut o' siller,
And broken the heart o' the barley Miller.----

The Miller was strappin, the Miller was ruddy,
A heart like a lord, and a hue like a lady;
The Laird was a widdifu', bleerit knurl;
She 's left the gude-fallow, and taen the churl.------

The Miller he hecht her, a heart leal and luving,
The Laird did address her wi' matter mair muving,
A fine pacing-horse wi' a clear chainet bridle,
A whip by her side, and a bonie side-sadle.

O wae on the siller, it is sae prevailing,
And wae on the luve that is fixed on a mailin!
A tocher 's nae word in a true lover's parle,
But, gie me my luve, and a fig for the warl!