The Deuk’s Dang O’er My Daddie

THE bairns gat out wi' an unco shout,
The deuks dang o'er my daddie, O
The fien-ma-care, quo' the feirie auld wife,
He was but a paidlin body, O.--------
He paidles out, an’ he paidles in,
An' he paidles late and early, O;
This seven lang year I hae lien by his side,
An he is but a fusionless carlie, O.-----

O had your tongue, my feirie auld wife,
O had your tongue, now Nansie, O:
I've seen the day, and sae hae ye,
Ye wad na been sae donsie, O.--------
I've seen the day ye butter'd my brose,
And cuddled me late and early, O;
But downa do 's come o'er me now,
And, Oh, I find it sairly, O!